....витай в нашій хыжі

Кривый смерек

Кідь єсь відів кривый смерек,
Наісно мі за правду даш,
Хоць і заперты очі маш,
Же якбач штосі му нерек.

Міг бысь на нім збачіти,
Кривы конаря, ігліці,
Яругу на ёго лиці,
Коли будеш проходити.

Страх аж горі зазерати,
Спрасканый, здутый, спареный,
Од стояня змукареный,
Хотів бысь го вырубати.

Возмеш гарвестор, не знаш як,
Стати собі на шыроко,
Приперти стромови око,
Зрізати бортака на пняк.

Посмоть до зеркала: то ты,
Костра зрахованых ребер,
То ты маш кривый характер.
(Не)зохаб смерек стояти.

2000, Нітра, русин-руснак

Увод

Витайте в нашій хыжі - на нашій вебовій сторінці. Наша хыжа мать названя русын-руснак а презентує главні фотографії зо жывота Руснаків. Можете ту найти фоткы карпатьской природы, церьковок і людей. Можете ся зачітати і до руснацькой поезії. Сторінку собі можете перечітати по руснацькы - на латіньці або на азбукі. Каждый хто ся народив міджі Руснаками знать яку ціну мать про нёго наш руснацькый край, рідна хыжа, родина, сны. Хто пив молоко од Русначкы - мамы, хто выповів руснацькы слова - є Руснак, Руснак незабыв на часы коли быв дітина, як бігав по Карпатьскых луках, зберав грибы по Карпатьскых лісах. Незабудьме вера на наш рідный край, де чіста водичка тече потоками, деревяна церковця молить ся з вами. То є наше - наш руснацкый поклад, скарб, котрый собі мусиме з любвов носити в серці а роздавати ёго и другым людям. Тримайме ся Руснаци. русин-руснак

Осінь

Осінь на днесь тыждень
Краю ся уж яла,
Скуршав ся літній день,
Гора зарычала.

Листя опадують,
Бо з них вышла душа
Люде поля орють
Скыбочка ся рушать

На нашій яблони
Згните ябко видно.
Банвурок як влони,
Грибы іщі слідно.

Осінь чурком тече,
доганять ю зима.
Рано мороз пече,
За уха нас їмать.

Тяжше рано стати,
перетерти сой очі
з постелі злізати
стресы перемочі.

2001, русин-руснак