....vitaj v našij chyži

Krivyj smerek

Kiď jes viďiv krivyj smerek,
naisno mi za pravdu daš,
choc i zaperty oči maš,
že jakbač štosi mu nerek.

Mih bys na ňim zbačiti,
krivy konarja, ihlici,
jaruhu na joho lici,
koli budeš prochoditi.

Strach až hori zazerati,
spraskanyj, zdutyj, sparenyj,
od stojaňa zmukarenyj,
choťiv bys ho vyrubati.

Vozmeš sokyrku, ne znaš jak,
stati sobi na šyroko,
priperti stromovi oko,
zrizati bortaka na pňak.

Posmoť do zerkala: to ty,
kostra zrachovanych reber.
To ty maš krivyj charakter.
(Ne)zochab smerek stojati.

2000, Nitra, rusyn-rusnak

Uvod

Vitajte v našij chyži - na naši webovij storinci. Naša chyža mať nazvaňa rusyn-rusnak a prezentuje hlavňi fotografii zo žyvota Rusnakiv. Možete tu najti fotky karpaťskoj prirody, cerkovok i ľudej. Možete sja začitati i do rusnackoj poeziji. Storinku sobi možete perečitati po rusnacky - na latinci abo na azbuki.
Každyj chto sja narodiv midži Rusnakami znať jaku cinu mať pro ňoho naš rusnackyj kraj, ridna chyža, rodina, sny. Chto piv moloko od Rusnačky - mamy, chto vypoviv rusnacky slova - je Rusnak, Rusnak nezabyv na časy koli byv ďitina, jak bihav po Karpatskych lukach, zberav hriby po Karpatskych ľisach. Nezabuďme vera na naš ridnyj kraj, de čista vodička teče potokami, derevjana cerkovcja moliť sja z vami. To je naše - naš rusnackyj poklad, skarb, kotryj sobi musime z ľubvov nositi v serci a rozdavati ho i druhym ľuďam. Trimajme sja Rusnaci.

Osiň

Osiň na dnes' tyždeň,
kraju sja už jala,
Skuršav sja litňij deň,
hora zaryčala.

Lisťa opadujuť,
bo z nich vyšla duša.
Ľude poľa orjuť,
skybočka sja rušať.

Na našij jabloňi,
zhnite jabko vidno.
Bandurok jak vloni,
hriby išči slidno.

Osiň čurkom teče,
dohanjať ju zima.
Rano moroz peče,
za ucha nas jimať.

Ťažše rano stati,
pereterti soj oči,
z posteli zľizati,
stresy peremoči.

2001, rusyn-rusnak